» » Bahan PJJ 3 - 9 Maret 2019, Aku, Suruhlah Aku

Bahan PJJ 3 - 9 Maret 2019, Aku, Suruhlah Aku

Unknown
Add Comment
Lifestyle

Aku, Suruhlah Aku 
Jesaya 6:1-8 
( Persikapen Pemilihen Calon Pertua-Diaken )

OGEN PUSTAKA SI BADIA
Dibata ndilo Jesaya jadi nabi
1. I bas tahun kematen Raja Usia, kuidah TUHAN. Ia sanga kundul i kursi kemulianNa si meganjang, janah jubahNa ndemi kerina Rumah Pertoton.
2. I sekelewetNa tedis malekat serafim si ernala-nala bagi api. Teptep serafim lit enem kabengna. Dua kabengna nutupi ayona, dua nari nutupi nahena, janah alu kabengna si dua nari kabang ia.
3. Silebuh-lebuhen ia nina,
“Badia, badia, badia!
TUHAN si Mada Kuasa badia kap!
Doni enda dem alu kemulianNa.”
4. Palas Rumah Pertoton e mugur-ugur ibahan sorana janah Rumah Pertoton e dem alu asap.
5. Erkiteken si e ningku, “Cilaka aku, lanai lit arapen man bangku. Bene me aku sabap alu matangku enggo kuidah Raja, TUHAN si Mada Kuasa, adi tep-tep ranan si mentas arah biberku dosa kerina, janah aku pe ringan i tengah bangsa i ja tep-tep kata si ibelaskenna dem alu dosa.”
6. Kenca bage sada i bas malekat srafim ndai nari kabang ndahi aku. Ibabana rara si ibuatna i bas batar-batar persembahen nari alu jepit-jepit.
7. Ikuitna biberku alu rara ndai, jenari nina, “Rara enda enggo ngkenai biberndu, e maka genduari salahndu enggo masap janah dosandu enggo ialemi.”
8. Kenca bage kubegi Tuhan ngerana nina, “Ise ndia Kusuruh? Ise ndia nggit maba berita i bas Aku nari?” E maka ningku ngaloi, “Aku, suruhlah aku!”

Dibata tetap encidahken keleng ateNa nandangi kerina tinepaNa. Guna nehken keleng ateNa e lpilihNa manusia jadi aronNa. Jadi aron Dibata eme persuruhen Dibata lako muat bagin i bas dahin-dahin Dibata. Dibata nge si milih sierdahinNa, alu erbage-bage dalanna Dibata milihsa. I bas Pustaka si Badia tangkas ituriken umpamana: Dibata ndilo Abram ( bdk. Kej. 12:1 ), Dibata nuruh Musa ( bdk. Kel. 3 ), Samuel ilebuh Tuhan ( bdk. 1 Sam. 3:1-10). Daud ipilih Tuhan jadi ( bdk. 1 Sam. 16:1-13 ), Elisa ipilih Tuhan (bdk. 1 Raj. 19:19-210, Jeremia ipilih Tuhan (bdk. Jer. 1:5). I bas Padan Si Mbaru pe ituriken kuga Tuhan Jesus milih ajar-ajarNa (bdk. Luk. 6:12-160. Dibata me similih sierdahinNa ras Dibata me si mereken gegeh, pemeteh ras kengasupen man sierdahinNa. Adi Dibata enggo erdilo, milih ras nuruh maka la lit gegeh manusia lako nilah ras nimbaksa. Tuhu erbage-bage pengaloken manusia i bas ngaloi pendilo ras isuruh Dibata tapi kedungenna erpengue nandangi pendilo Dibata.

Erlajar kita arah turi-turin kuga Dibata ndiio Jesaya jadi nabi. Kecibal bangsa Israel paksa si e eme kegeluhen si dem i bas dosa. I bas kecibal si bagenda rupana, Jesaya tetap ertutus ate nembah man Dibata. Paksa Dibata ndilo Jesaya jadi nabi, kejadin e inganna eme i bas rumah pertoton. isaksiken Jesaya maka iidahna Tuhan "kuidah TUHAN. la sanga kundul i kursi kemulianNa si meganjang, janah jubahNa ndemi kerina Rumah Pertoton. Rikut pe malekat serafim si ernala-nala bagi api...Silebuhlebuhen ia nina, "Badia, badia, badia! TUHAN si Mada Kuasa Badia kap! Doni enda dem atu kemulianNa." Dibata jine si reh rikut pe ras malekatNa njumpai Jesaya i rumah pertoton. Malekat si lebuh-lebuhen nehken puji-pujin man Dibata Si Mada Kuasa ras nuriken maka Dibata e Badia kap. Alu pujin enda ngingetken mulihi kerna kecibal bangsa israel si lanai badia, bangsa si enggo meiket desken diberu perlua-lua. Ngidah si e kerina minter iakuken Jesaya dosa-dosana "Cilaka aku, lanai lit arapen man bangku.

Bene me aku sabap alu matangku enggo kuidah Raja, TUHAN si Mada Kuasa, adi tep-tep ranan si mentas arah biberku dosa kerina, janah aku pe ringan i tengah bangsa i ja tep-tep kata si ibelaskenna dem alu dosa." I bas Jesaya nggo ngakuken dosa-dosana ras dosa-dosa bangsa Israel, ialokenna me pengalemi dosa, Sada i bas malekat srafim ndai nari kabang ndahi Jesaya. lbabana rara si ibuatna i bas batar-batar persembahen nari alu jepit-jepit. Ikuitna biber Jesaya alu rara ndai, jenari nina malekat ndai, "Rara enda enggo ngkenai biberndu, e maka genduari salahndu enggo masap janah dosandu enggo ialemi." Kalak si nggit ngakuken dosa-dosana maka pasti ngaloken pengalemi dosa. Jesaya enggo ipebadiaken, kenca bage ibegi Jesaya me Tuhan ngerana nina, "Ise ndia Kusuruh? Ise ndia nggit maba berita i bas Aku nari?" E maka nina iesaya ngaloi, "Aku, suruhlah aku!" Jesaya erpengue erkiteken igejapkenna uga belinna kuasa Dibata, keleng ate Dibata si enggo ngalemi dosa-dosana, sabab paksa iidah Jesaya Tuhan ras malekatNa nina "Cilaka aku, lanai lit arapen man bangku, bene me aku..." tapi kai si jadi? Jesaya la ndatken cilaka ras la bene erkiteken ngaloken pengalemi dosa idur Dibata nari. Kalak si enggo nggejapken geluhna ipasu-pasu Dibata, pulah i bas erbage-bage kebiaren nari ras ipebadiaken Dibata tentuna erpengue nandangi pendilo ras persuruhen Dibata.

I bas paksa enda, gerejanta ersikap ngelakoken pemilihen calon Pertua ras Diaken GBKP guna periode 2019-2024. Erpalasken Tata Gereja GBKP, Tata laksana Pasal 80, salah sada si jadi hak tep-tep anggota ngawan eme `memilih dan dipilih menjadi pelayan khusus' ( Pertua ras Diaken ). I bas kita ersikap ngalo-ngalo pemilihen calon Pertua ras Diaken enda marilah sijadiken pemilihen enda jadi `pesta kiniteken'. Ertina, paksa pemilihen e silakoken erpalasken kinitekenta segelah kerina banci erdalan alu mehuli. Jaga maka ula sempat turah perubaten i tengah-tengah perpulungenta. Tep-tep kalak si terpilih tek kita maka Dibata kap si milihsa arah perpulungenNa emaka erpenguelah tep-tep kalak si terpilih bagi Jesaya nina 'aku, suruhlah aku' ula sempat nulak ntah nuduhi kalak si deban. Kalak si erpengue eme kalak si enggo nggejapken kerna belinna keleng ate Dibata si enggo ialokenna ku bas geluhna. Erpengue nandangi persuruhen Dibata eme kalak si nggit ngataken bujur man Dibata. Nggit erbelas `aku, suruhlah aku' labo biak si pelebe-lebeken, labo encidahken kiniganjangen ukur tapi pusuh si ersuruh erkiteken enggo ngaloken perkuah ate ras keleng ate Dibata.

EVALUASI :
Nggo nge kita ngasup la jungut-jungut ras la merawa amin gia la bagi ukurta?

DISKUSI :
  1. Kai nge sierbahanca maka Jesaya nggit ngaloi nina "Aku, suruhlah aku?"
  2. Kai-kai saja si banci silakoken guna njadiken pemilihen calon Pertua ras Diaken jadi 'pesta' kiniteken?
AKSI : 
Ersikap kita arah pertotonta guna sikap milih ntah ipilih jadi calon Pertua ras Diaken guna periode 2019-2024.

USULEN LAGU :
TOPIK PERTOTON SYAFAAT : 
  1. Ngawan GBKP ersikap guna pemilihen calon Pertua ras Diaken Periode 2019-2024. 
  2. BPMR ras Panitia Pemilihen calon Pertua ras Diaken Periode 2019-2024 ibereken Tuhan kepentaren. 
  3. Anggota GBKP alu pusuh si ersuruh erpengue nandangi persuruhen Dibata.
  4. Si turah i bas perpulungen.

0 Response to "Bahan PJJ 3 - 9 Maret 2019, Aku, Suruhlah Aku"

Langganan: Posting Komentar (Atom)